2Sa 7 | NdeIBE | STEP | Kwathi inkosi isihlala esigodlweni sayo uJehova eseyiphumuzile kuzo zonke izitha zayo enhlangothini zonke,

2 Samuel 7

Isithembiso sikaNkulunkulu kuDavida

1 Kwathi inkosi isihlala esigodlweni sayo uJehova eseyiphumuzile kuzo zonke izitha zayo enhlangothini zonke, 2 yathi kuNathani umphrofethi, “Mina ngilapha, ngihlala esigodlweni semsedari, kodwa ibhokisi lesivumelwano sika-Nkulunkulu lilokhu lihlala ethenteni.”

3 UNathani waphendula inkosi wathi, “Loba kuyini okusengqondweni yakho, qhubeka ukwenze, ngoba uJehova ulawe.”

4 Ngalobobusuku ilizwi likaJehova lafika kuNathani lisithi:

5 “Hamba uyetshela inceku yami uDavida uthi, ‘Nanku okutshiwo nguJehova: Nguwe yini omele ungakhele indlu yokuhlala na? 6 Mina angikaze ngihlale endlini kusukela ngosuku engakhupha ngalo ama-Israyeli eGibhithe kuze kube lamhla. Ngibe ngihamba ngisuka kwenye indawo ngisiya kwenye ithente liyindawo yami yokuhlala. 7 Loba kungaphi engahamba khona labako-Israyeli bonke, ngake ngatsho yini komunye wababusi babo engangibalaye ukuba beluse abantu bami u-Israyeli ngathi, “Kungani lingangakhelanga indlu yemisedari na?’ ”

8 “Ngakho-ke, tshela inceku yami uDavida uthi, ‘Nanku okutshiwo yiNkosi uSomandla: Ngakususa emadlelweni lasekulandeleni izimvu ukuba ube ngumbusi wabantu bami u-Israyeli. 9 Ngibe lawe loba kungaphi lapho oya khona, njalo ngizichithile zonke izitha zakho phambi kwakho. Khathesi ngizakwenza ibizo lakho libe likhulu, njengamabizo amadoda adumileyo asemhlabeni. 10 Njalo ngizabanika indawo abantu bami u-Israyeli ngibagxumeke ukuze babe lekhaya elingelabo bangabe besakhathazwa futhi. Abantu ababi kabasayikubacindezela futhi njengalokhu abakwenza ekuqaliseni,

11 bakwenza futhi kusukela ngesikhathi engamisela ngaso abantu bami u-Israyeli abakhokheli. Njalo ngizakuphumuza kuzo zonke izitha zakho. “ ‘UJehova wafunga kuwe ukuthi uJehova yena ngokwakhe uzakumisela indlu: 12 Lapho izinsuku zakho seziphelile usuphumula laboyihlo, ngizakwenza oyinzalo yakho athathe isikhundla sakho, ozaphuma emzimbeni wakho, ngizawuqinisa umbuso wakhe. 13 Lowo nguye ozakwakhela iBizo lami indlu, njalo ngizaqinisa isihlalo sobukhosi sombuso wakhe kuze kube nininini. 14 Ngizakuba nguyise, yena abe yindodana yami. Angenza okubi ngizamjezisa ngomqwayi wabantu, ukuklebhula okwenziwa ngabantu. 15 Kodwa uthando lwami kaluyikususwa kuye lanini, njengokulususa kwami kuSawuli, engamsusayo phambi kwakho. 16 Indlu yakho lombuso wakho kuzaqina nini lanini phambi kwami; isihlalo sakho sobukhosi sizakuma kuze kube nininini.’ ”

17 UNathani wambikela uDavida wonke amazwi alesisambulelo.

Umkhuleko kaDavida

18 Emva kwalokho inkosi uDavida wangena wahlala phambi kukaJehova wathi: “Ngingubani, awu Jehova Wobukhosi, labendlu yami bayini, ukuba ungifikise lapha na? 19 Njalo sekungathi lokhu akwanelanga emehlweni akho, awu Jehova Wobukhosi, usukhulumile futhi ngesikhathi esizayo sendlu yenceku yakho. Le yiyo yini indlela yakho ejwayelekileyo yokuphatha abantu, awu Jehova Wobukhosi?

20 “Kuyini okunye uDavida angakutsho na? Ngoba inceku yakho uyayazi, awu Jehova Wobukhosi. 21 Ngoba ngenxa yelizwi lakho langentando yakho, uyenzile into le enkulu njalo wayenza yazakala encekwini yakho.

22 “Yeka ubukhulu bakho, awu Jehova Wobukhosi! Kakho onjengawe, njalo kakho uNkulunkulu ngaphandle kwakho, njengoba sizizwele ngezindlebe zethu. 23 Njalo ngubani onjengabantu bakho u-Israyeli isizwe sinye emhlabeni uNkulunkulu ayazihlengela sona eGibhithe ukuba sibe ngabantu bakhe, lokuze azenzele udumo kanye lokwenza izimangaliso ezinkulu lezesabekayo ngokuxotsha izizwe labonkulunkulu bazo phambi kwabantu bakho owabahlenga eGibhithe na? 24 Ubeke abantu bakho u-Israyeli njengabangabantu bakho kuze kube nininini, njalo wena, awu Jehova, usube nguNkulunkulu wabo.

25 “Khathesi-ke, Jehova Nkulunkulu, sigcine kuze kube phakade isithembiso osenzileyo mayelana lenceku yakho lendlu yayo. Yenza njengokuthembisa kwakho,

26 ukuze ibizo lakho libe likhulu kuze kube nininini. Lapho-ke abantu bazakuthi, ‘UJehova uSomandla unguNkulunkulu ka-Israyeli!’ Lendlu yenceku yakho uDavida izamiswa phambi kwakho.

27 “Awu Jehova Wobukhosi, Nkulunkulu ka-Israyeli, ukuvezile lokhu encekwini yakho usithi, ‘Ngizakwakhela indlu.’ Ngakho inceku yakho ibe lesibindi sokukhuleka umkhuleko lo kuwe. 28 Jehova Wobukhosi, unguNkulunkulu! Amazwi akho athembekile, njalo uthembise inceku yakho lezizinto ezinhle. 29 Khathesi-ke ake uthokoziswe yikubusisa indlu yenceku yakho, ukuze ihlale isemehlweni akho kuze kube nininini; ngoba wena, awu Jehova Wobukhosi, usukhulumile, njalo ngokubusiswa nguwe indlu yenceku yakho izabusiseka kuze kube nininini.”